Slavica Sarkotić
JOŽEKOF GREH
(Za drvenim stolom pokrivenim crveno-bijelim kockastim stolnjakom sjedi muškarac srednjih godina, onizak, debeljuškast.
Glavu je naslonio na ruke i govori sam sa sobom.)
– Jesem, Barek, priznam, jesem. Prevaril sem te. I bum ti to rekel v oči ščem za s placa vrneš.
(počinje plakati, otire suze rukavom.)
– Nemrem tu sramotu više podnašati. Ti me pitaš zakaj ne spim. Videl bi ja tebe da si ti na mem mestu. Je, ali tebe se to ne bi moglo zgoditi. Zato kaj si ti bogobojazna i pobožna, ti si dobra žena praf onak kak treba biti.
A viš mene norca. Kak sem nasel kak bedak. A nigdar te do sad nesem prevaril če baš smo trideset let v braku.
Ali nesem samo ja kriv. Veruj mi, nesem. Ona me navlekla, prasica jena. Bil sem si malo preveč gemištof popil s kumom Tomekom posle onoga sastanka ribolofcef.
Otišli smo prek puta društvenoga doma v bertiju k Lojzeku. I tak pomalo, spominek, reč po reč i kupice su se samo praznile.
Gda sem zišel van i komaj jedva našel beciklina sem svatil da ga ne bum mogel voziti, vraži me beciklin furt vlekel nekam na stran.
Kum Tomek je sel f svojega pežoja i odmeglil niz vulicu, zafrkant jen, navek je mogel popiti više od mene.
Pošel sem pešice vuličkum i vlekel beciklina a on je vlekel mene. Najemput sem čul da me negdo zove, Jožek, Jožek, dej počakaj.
Okrenul sem se i unda sem ju spazil. Išla je valda s posla, znaš da ona vu nem velikem dućanu dela prek v gradu, oni delaju do devet i sad je valda z busom došla pak ide domom.
Moral sem je se javiti, em bi bilo nepristojno da se ne javim, kaj ne bi, Barica, i ti bi je se morala vjaviti da si tam bila. Narafski, to bi ze sem drugač bilo zato aj ste vi i jena i druga ženske.
Je, a ja sem muškarec, vu vem slučaju nažalost, jer da sem žensko unda se ovo nigdar ne bi bilo ni dogodilo.
(ispuhne nos u kuhinjsku krpu)
– Barica moja draga, kak bum ja sad tebe to se objasnil, kak, gda znam da buš mam na me skočila kak luta kača. A moram ti reči zato kaj ja već tri mesece nemrem spati kuliko me grize ta vraža savest, do vezda nesem ni znal da ju imam. Ja ti bum se spovedal kak je bilo a ti unda sudi.
Če baš znam kak bu tvoja presuda glasila. Kriv je. Tak bu glasila. Jesem, priznam, kriv sem, vubi me sad ali ja nazaj nemrem. A štel bi. Da me je samo tu večer vraži becikli slušal, da ga je kum Tomek vrgel v gepek i dovezel me k tebe domom, mene i beciklina, viš kak se toga unda nesmo setili.
Sad je tak kak je.
(uzdahne žalosno i opet obriše nos)
– Ovak ti je to bilo, mila moja Barek, rožica moja, i lubaf moja. Se ti povem da si dušu smirim, če baš znam da me više nigdar ne buš onak milo kak negda gledela s temi tvojemi lepemi plavemi očijami, nigdar mi više ne buš veruvala i to me od sega najviše boli.
A zakaj? Barek draga, ne to da ja zdaj tebe govorim poradi tega kaj se opravdati očem, ali veruj mi, Barica, ona tebe ne vredna, ne, po ničemu ti ne ravna, ne, Barica moja. Da vidiš kak debele noge ima gore znad kolena i pune onoga, kak se ono veli, celulita. A ti si kak violina, lepa moja rožica.
Kaj me tam nosilo, vu tu hižu, kaj? Norc jen stari. Joj, prosil te bum, naj dece povedati, za Boga miloga, to ne bi mogel podnesti, da me se deca sramiju, naj Barica, kak Bogeka te prosim, od sada pak zanavek te bum slušal, evo, če očeš i gemištof se bum ostavil, i ribičije, furt bum s tobum doma, Barica, samo me naj od sebe porinuti gda ti of svoj greh spovem. Zato kaj ja brez tebe i dece ne bi mogel živeti. Vubil bi se, Barica, da me ti ostaviš. Evo, obečam ti da pem i f cirkvu če baš nes leta pri meše bil, pem na spoved, se bum župniku Jantonu spovedal, pak nek me i on kaštiguje kak mi i pripada. Kej sem si priredil to bum i pokusal.
A kak je to bilo? Bum ti povedal. Samo gda s placa prideš.
(uzdah, sat na zidu otkuca devet puta)
– To gda je ona mene zazvala ja sem se najprf napravil da ne čujem. Ali je, figu, ona se požurila i za čas me fletno dostigla. A imala je onu svoju bluzu na tere se gumbi očeju raspuknuti kuliko je tesna i šos mini isto tak vuzek da ne znam kak vu njem hoditi more. Vuz se to još štikle, plave, takve još nigdar nes videl, veruj mi, ne lažem, Barica, nigdar ti više ne bum lagal, nesem ni prve, ovo jedino sem ti zatajil i košta me mirnoga života.
Bili smo baš spod vulične lampe i ja sem videl kak je se prsa nadižu, teško je dijala zato kaj se za menum se žurila. A dišala je po jasminu ili po đurđicami, sad nesem više siguren, ali lepo je dišala. Dobro, to ti ustvari i ne moram pripovedati, to kak je dišala, zato kaj to za celu pripovest ne bitno a tebe bi moglo uvrediti jer bi mogla pomisliti da je dišala lepše od tebe, Barek, a to ne istina, ne.
Nigdo ne diši tak lepo kak ti, rožica moja lublena. Ali te put ja sem bil nemočen, veruj mi, bil sem nemočen kak malo dete, ono tero premačeš na stolu a ono te samo gledi.
Ona je videla f kakvem sem ja stajnu i mogla se smiluvati, prasica jena, ali ne štela. Samo se smejala i oni lepi beli zubi su je se lesikali na svetlu vulične lampe i mislim si znaš, da to nesu nejni prirodni zubi, kak bi tak beli mogli biti, sigurno si je dala navlake deti ili premenila cele zube samo da bu lepše zgledala. Tam na blagajne gda dojdeš ona sakoga v oči pogleda onak prodorno tak da ti kosti prebije te nejin pogled i unda ukucava brojke vu stroj i čovek trpa kupleno v kolica a oči ti furt bežiju na nejin dekolte. Ali dobro, to sad ne bilo v dučanu nek na vulice. I unda ti je ona mene beciklina z ruk otela i rekla, joj, sused Jožek, vi slabo vidite po mraku, vas gledim kak se popikavlete, dejte bum vam ja beciklina vozila a vi se za me primlete pak idemo pomalo domom.
I tak je ona onu svoju torbu na beciklina zakvačila i z desnum rukum beciklin vozila a z levum mene pridržavala.
(uzdiše, uh, uh, ne zna kako bi dalje pripovijedao, rukom gladi koljeno na pohabanim hlačama)
– Joj, Barek, ne znam kak dale ti pripovedati, najgorše tek prihaja. Ja sem se za nju držal i zbilam sem bole hodil, a ona je bila tak meka i dišeča... sram me je, Barica, sram me je i navek me bu, ali tak je bilo. Ona je mene skoro na silu k sebe domom odvlekla, veruj mi. Ja si nesem bil f stajnu pomoči, nesem bila kader.
Ona je mene vupelala vu svoju kujnu, posela na stolec i slekla mi kaput, a baš sem bil zel one stari kaj su ga na jenem mestu moljci prepiškali a ti si obečala da buš to zašila ali nesi mogla iglu najti. I tak je ostalo. Ne da se pravdam, Barica, ali tak je, znaš i sama. Ja znam da ti imaš puno posla i z decum i z kuvanjem, i z vrtom, i da ti je teško na plac iti i tam duge vure stati i vugorke, paradajz, sir i mleko prodavati, ali ne ni mene lako vu nem skladištu, negda nosim tak žmeke vreče da mislim da bum okilavel. A unda si pomislim kak bi to tebe bilo sejeno zato kaj ti to, te bračne dužnosti tak i tak samo službeno obavlaš, bez nejakove velike vole, em znaš i sama, ne da ja tebe špotam ili ti prigovaram, ali ti si navek umorna gda se ja k tebe primeknem. Ili veliš da moliš krunicu i nek malo pričekam. A dok ti zmoliš krunicu ja več zaspim. Nesem ni ja več mlad, pedeseta je prešla.
(natače si vode u čašu)
– Grlo mi se zesušilo od pripovedajna, a kak bu tek gda ti prideš. Ovo je samo proba. Vu te nejne kujne se je dišalo po nejakovemi mirodijami i tu ti je ona mene šeri natočila, da je to dobro pred spajne, i ja sem norc to popil, morti mi je i kakvu drogu nuter dela, ne da se pravdam, sam sem kriv, samo velim, sega ima.
I unda je rekla da ide f kupaonicu i za čas zišla f hausmantlu boje breske a kak je dišala to ti nemrem opisati.
(potiho šapne, to ti ni ne bum povedal)
- Joj, kak bi rada da sem se unda zdigel i otišel. Bil bi kaj sem več tridest let, pošten muž i otec. Ali mene su se noge posekle od onoga šerija i od onoga kak je ona dišala, kak da sem bil drogeran. Unda mi je prišla i podragala me po lasima, ja ne pametim da si ti to napravila, i rekla je, joj, sused Jožek, vi ste takof veliki mučenik i navek samo o žene i dece pripovedate. A vište, ove moj razbojnik, kak bi ga drugač nazvala, rekel je da ide v inozemstvo samo na leto ili dve dok fasadu napravimo a zdaj je več pet let v Austrije i se ređe prihađa pak je mene pusto. Če baš, donese on i ojre i parfeme, ali ne to to. Žene treba muška ruka, podrška. Vište sused, ja bum k letu pedeset, moja deca su več od doma otišla, imaju svoje familije i ja sem ostala sama. A ne lako žene biti sama. Tu mi ju je došlo žal pak sem ju objel. I dale se Barek moja ničega više ne sečam. Znam samo da me je vjutro zdrmala za rame i rekla, ojte sused domom, bu se Barica sikerala de ste, vi je rečete da ste pri kumu Tomeku prespali, on vam bu dal alibi,samo ga prosete, njemu rečete da ste v grabe prespali i da se Barice bojite. Ja sem beciklin pod sušu skrila, sad pem po njega a za Baricu ne brinete, maloprve je otišla f štalu krave podojiti.
(opet duboki uzdah i pogledavanje na sat)
– Ja sem mislil da mi bu bar kavu skuvala ali niš. Pak sem unda došel domom i rekel sem ti se kak me ona naputila. Ali najprf sem navrnul do Tomeka i prosil ga da moju priču potvrdi. Dobro da mi je mobitel ostal doma inače bi me ti skužila prve i morti me od ove sramote spasila. Tomek je pristal, gda me videl bledoga i raščupanoga morti je i poveruval da sem v grabe prespal.
Ti si mi rekla da si nakanila posle gda štalu obaviš otiti do Tomeka jer si vu brige bila, sirota moja, a če on ne bi niš znal unda bi bila na policiju išla. Bila si vesela gda si me videla i objela si me če baš nesem bil toga vreden. Od unda se pitam si li primetila da po nje dišim. Ništa nesi rekla, dobra moja Barica, samo si me čudno gledela i poslala me mam da se idem oprati če baš je bila nedela i nesem moral na posel.
E to ti je sa priča i tak ti bum se povedal samo gda se z placa vrneš.
( sat otkuca deset puta, Jožek pogleda iza sebe i u okviru vrata ugleda Baricu, skoči i pri tome prevrne čašu s vodom, spotakne se i padne a onda glasno zaplače)
Barek, vrak mu mater jebi, pa kam s tem kolcem na me ideš, če si ponorela? Bareeek!